आरोपींच्या अटकेसाठी समाजवादी पक्षाचे बेमुदत धरणे आंदोलन
पुणे: सासवडजवळील ऑस्करवाडी तलाव परिसरात मुस्लिम बांधवांवर झालेल्या हल्ल्याला आठवडा उलटूनही आरोपींना अद्याप अटक न झाल्याने राजकीय वातावरण तापले आहे. पुणे ग्रामीण पोलिसांच्या संथ भूमिकेचा निषेध करत समाजवादी पक्षाने आजपासून पुणे ग्रामीण पोलीस अधीक्षक कार्यालयासमोर बेमुदत धरणे आंदोलन सुरू केले आहे.
“पुणे ग्रामीण पोलिसांचं चाललंय काय?” – जांबुवंत मनोहर यांचा सवाल
आंदोलनाचे नेतृत्व करताना समाजवादी पक्षाचे पुणे शहराध्यक्ष जांबुवंत मनोहर यांनी प्रशासनावर कडक शब्दांत टीका केली. “गुन्हा दाखल होऊनही आरोपी मोकाट कसे? पुणे ग्रामीण पोलिसांचं नक्की चाललंय काय?” असा सवाल त्यांनी उपस्थित केला. तसेच, या हल्ल्याचे गांभीर्य लक्षात घेता यात ‘खुनाच्या प्रयत्नाचा’ (Attempt to Murder) गुन्हा दाखल करावा, अशी मागणीही पक्षाने केली आहे.
दुजाभाव का? प्रशासनावर संशयाची सुई
प्रदेश सरचिटणीस अनिस अहमद यांनी पोलिसांच्या दुटप्पी भूमिकेवर शंका उपस्थित केली. ते म्हणाले की, “काही दिवसांपूर्वी बोगदेव घाटात झालेल्या महिला अत्याचार प्रकरणात ग्रामीण पोलिसांनी तत्काळ हालचाली करत आरोपींना गजाआड केले होते. मग याच प्रकरणात दिरंगाई का? यामागे सरकारचा काही दबाव आहे का?”
आंदोलनातील प्रमुख सहभागी
या आंदोलनात समाजवादी पक्षाचे अनेक दिग्गज पदाधिकारी आणि कार्यकर्ते सहभागी झाले आहेत, ज्यात प्रामुख्याने:अनिस अहमद (प्रदेश सरचिटणीस)दत्ता पाकिरे (शहर सरचिटणीस)विनायक लांबे (प्रदेश कार्यकारिणी सदस्य)अशोकराव गायकवाड, प्रकाश डोंबाळे, जावेद शेख, भारत मालुसरे आणि इतर कार्यकर्त्यांचा समावेश आहे.
पुढील पवित्रा
समाजवादी पक्षाने स्पष्ट इशारा दिला आहे की, जोपर्यंत आरोपींना अटक होत नाही आणि कठोर कलमे लावली जात नाहीत, तोपर्यंत हे धरणे आंदोलन मागे घेतले जाणार नाही. प्रशासनाने तातडीने पावले न उचलल्यास आंदोलन अधिक तीव्र करण्याचा इशाराही देण्यात आला आहे.
