पिंपरीत मध्यरात्री अग्नितांडव! शगुन चौकातील पूजा साहित्याची दुकाने भस्मसात.
जवानांनी जिवाची बाजी लावून टाळला महाअनर्थ
दोन अग्निशमन जवान जखमी; सुदैवाने जीवितहानी टळली | महापालिका आयुक्तांकडून जवानांच्या धाडसाचे कौतुक
पिंपरी चिंचवड प्रतिनिधी दि. ३ : पिंपरीतील गजबजलेल्या शगुन चौकात मध्यरात्रीच्या सुमारास भीषण अग्नितांडव घडले. पूजा साहित्याच्या दोन दुकानांना अचानक लागलेल्या भीषण आगीने संपूर्ण परिसर हादरवून सोडला. मध्यरात्री १२:४९ वाजता लागलेल्या या आगीत ज्वलनशील पूजा साहित्यामुळे क्षणार्धात आगीच्या भयंकर ज्वाळा आणि धुराचे लोट उठू लागले. मात्र, पिंपरी चिंचवड महापालिकेच्या अग्निशमन दलाने दाखवलेली गनिमी काव्यासारखी तत्परता आणि जवानांच्या अफाट धाडसामुळे संपूर्ण बाजारपेठ आगीच्या भक्ष्यस्थानी पडण्यापासून वाचली. या थरारक मोहिमेत आग विझवताना दोन अग्निशमन जवान जखमी झाले आहेत.
कंट्रोल रूममध्ये वाजली धोक्याची घंटा, चार केंद्रांच्या गाड्या घटनास्थळी मध्यरात्रीच्या शांततेत १२:४९ वाजता महापालिकेच्या नियंत्रण कक्षात आगीचा कॉल आला. घटनेचे गांभीर्य ओळखून मुख्य केंद्रासह नेहरूनगर, थेरगाव आणि रहाटणी या चार अग्निशमन केंद्रांच्या बंबांनी सायरन वाजवत अवघ्या काही मिनिटांत शगुन चौक गाठला. दोन्ही दुकानांमध्ये कापूर, अगरबत्ती, तेल, लाकडी वस्तू व इतर ज्वलनशील साठा ठासून भरलेला असल्याने आगीने रौद्ररूप धारण केले होते.
आत कोणी अडकलेय का? जवानांची धूर भेदून धडकघटनास्थळी पोहोचताच अग्निशमन जवानांनी स्वतःच्या प्राणाची पर्वा न करता सर्वप्रथम दुकानांमध्ये कोणी नागरिक किंवा कामगार अडकले आहेत का, याची खातरजमा केली. आत कोणीही नसल्याचे स्पष्ट होताच चारही बाजूंनी पाण्याचा प्रचंड मारा सुरू करण्यात आला. नियोजनबद्ध व्यूहरचना आखत जवानांनी आगीची कोंडी केली आणि आग शेजारच्या दाटीवाटीच्या दुकानांमध्ये पसरण्यापूर्वीच तिला रोखून धरले.
दोन जवान जखमी, वायसीएममध्ये उपचार सुरू या अटीतटीच्या कारवाईदरम्यान आगीच्या ज्वाळांशी दोन हात करताना फायरमन प्रणय शिर्के आणि फायरमन आदिल गोडे हे दोन जवान आगीत किरकोळ जखमी झाले. त्यांना तातडीने वायसीएम रुग्णालयात दाखल करण्यात आले असून त्यांची प्रकृती स्थिर आहे.
उप आयुक्त व्यंकटेश दुर्वास यांच्या मार्गदर्शनाखाली उप अग्निशमन अधिकारी गौतम इंगवले, लीडिंग फायरमन विजय घुगे, जखमी जवान प्रणय शिर्के व आदिल गोडे यांच्यासह इतर जवानांनी दाखवलेल्या समयसूचकतेमुळे शहराच्या मध्यवर्ती भागातील कोट्यवधींची मालमत्ता भस्मसात होण्यापासून वाचली.
”नागरिकांचे प्राण आणि मालमत्ता वाचवणे हेच आमचे प्रथम कर्तव्य आहे. शगुन चौकातील घटनेत जवानांनी दाखवलेले धाडस आणि वेळेत घेतलेला निर्णय अत्यंत कौतुकास्पद आहे. यामुळेच लगतचा परिसर आगीच्या विळख्यातून वाचला. जखमी जवानांवर योग्य वैद्यकीय उपचार सुरू असून, अशा प्रतिकूल परिस्थितीतही कर्तव्याला प्राधान्य देणाऱ्या या जवानांचा महापालिकेला सार्थ अभिमान आहे.”— डॉ. विजय सूर्यवंशी, आयुक्त, पिंपरी चिंचवड महानगरपालिका
