चिंचवडमधील कुणाल मार्केटच्या पार्किंगमध्ये मध्यरात्री भीषण आग.
अग्निशमन दलाच्या तत्परतेने टळली जीवितहानी, १५ नागरिकांची सुखरूप सुटका
पिंपरी, दि. २९ ऑक्टोबर (विशेष प्रतिनिधी) : चिंचवड येथील चाफेकर चौक परिसरातील ‘कुणाल मार्केट’च्या पार्किंगमध्ये गुरुवार (दि. २९) मध्यरात्री पावणे दोनच्या सुमारास भीषण आग लागल्याची दुर्घटना घडली. या आगीत १७ दुचाकी, २ चारचाकी वाहने आणि एक सायकल जळून खाक झाली. दरम्यान, इमारतीच्या टेरेसवर अडकलेल्या सुमारे १५ नागरिकांची अग्निशमन दलाच्या जवानांनी धाडसी बचावकार्य राबवून सुखरूप सुटका केली. अग्निशमन विभागाच्या समयसूचकतेमुळे सुदैवाने कोणतीही जीवितहानी झाली नाही.
मध्यरात्री आगीचे तांडव गुरुवारी मध्यरात्री १.४५ च्या सुमारास कुणाल मार्केटच्या पार्किंग परिसरात अचानक आग भडकली. काही क्षणांतच आगीने भीषण रूप धारण केल्यामुळे पार्किंगमधील वाहने आगीच्या भक्ष्यस्थानी पडली. आगीचा धूर आणि ज्वाला इमारतीत पसरल्याने नागरिकांमध्ये प्रचंड घबराट उडाली. स्वतःचा जीव वाचवण्यासाठी अनेक रहिवासी थेट इमारतीच्या टेरेसवर धावले.
४ केंद्रांमधून अग्निशमन दलाची धाव घटनेची माहिती मिळताच पिंपरी चिंचवड महानगरपालिकेच्या मुख्य अग्निशमन केंद्रासह प्राधिकरण, थेरगाव आणि नेहरूनगर अग्निशमन केंद्रांमधून तातडीने ४ अग्निशमन बंब घटनास्थळी दाखल झाले. जवानांनी एका बाजूने आगीवर नियंत्रण मिळवण्यास सुरुवात केली, तर दुसऱ्या बाजूने टेरेसवर अडकलेल्या नागरिकांच्या बचावासाठी मोहीम हाती घेतली.
धाडसी बचावकार्य; १५ नागरिकांची सुटका इमारतीच्या टेरेसवर अडकलेल्या सुमारे १५ नागरिकांमध्ये महिला, पुरुष, ज्येष्ठ नागरिक आणि काही रुग्णांचा समावेश होता. जवानांनी अत्यंत कौशल्याने आणि धैर्याने या सर्व नागरिकांना सुरक्षितपणे खाली उतरवले. या दुर्घटनेत एका व्यक्तीला दुखापत झाली असून, त्यांना उपचारासाठी तात्काळ जवळच्या तालेरा रुग्णालयात दाखल करण्यात आले आहे.
मोठ्या प्रमाणावर वाहनांचे नुकसान अग्निशमन दलाच्या जवानांनी शर्थीचे प्रयत्न करून आगीवर पूर्णपणे नियंत्रण मिळवले. मात्र, तोपर्यंत पार्किंगमध्ये उभ्या असलेल्या १७ दुचाकी, २ चारचाकी गाड्या, १ सायकल तसेच इमारतीचे वायरिंग साहित्य जळून मोठे आर्थिक नुकसान झाले. आगीचे नेमके कारण अद्याप स्पष्ट झालेले नाही.
अग्निशमन विभागाचे नागरिकांना आवाहन अशा आपत्कालीन किंवा आगीच्या घटनांमध्ये नागरिकांनी घाबरून न जाता संयम बाळगावा. आग लागल्यास त्वरित १०१ या आपत्कालीन क्रमांकावर संपर्क साधून अचूक पत्ता व परिस्थितीची माहिती द्यावी. दुर्घटनास्थळी अनावश्यक गर्दी न करता अग्निशमन दलाच्या सूचनांचे काटेकोर पालन करावे, असे आवाहन अग्निशमन विभागाच्या वतीने करण्यात आले आहे.
