शिष्यवृत्ती परीक्षेत कु. स्वराली महादेव मुळे हिचे दैदिप्यमान यश
श्री सयाजीनाथ महाराज विद्यालयात सत्कार
पुणे / प्रतिनिधी दि.१७ : ग्यानबा सोपानराव मोझे ट्रस्ट, पुणे संचालित श्री सयाजीनाथ महाराज विद्यालय, वडमुख वाडी येथील विद्यार्थिनी कु. स्वराली महादेव मुळे हिने नुकत्याच जाहीर झालेल्या शिष्यवृत्ती (स्कॉलरशिप) परीक्षेत घवघवीत यश संपादन करत तृतीय क्रमांक पटकावला आहे. तिच्या या उल्लेखनीय यशाबद्दल विद्यालयात आयोजित विशेष कार्यक्रमात तिचा जाहीर सत्कार करण्यात आला.
विद्यालयाच्या प्रांगणात संपन्न झालेल्या या सत्कार समारंभास संस्थेचे पदाधिकारी, विद्यालयाचे मुख्याध्यापक, सर्व शिक्षक वृंद, शिक्षकेतर कर्मचारी, पालक आणि बहुसंख्य विद्यार्थी उपस्थित होते. मान्यवरांच्या हस्ते स्वराली हिला पुष्पगुच्छ, सन्मानचिन्ह व प्रशस्तीपत्रक देऊन गौरविण्यात आले.
स्वराली हिने मिळवलेल्या या यशामुळे संपूर्ण परिसरात तसेच शाळेत आनंदाचे वातावरण निर्माण झाले आहे. तिच्या या यशात तिची मेहनत, पालकांचे सहकार्य आणि शाळेतील शिक्षकांचे मोलाचे मार्गदर्शन लाभल्याचे तिने सांगितले.
शाळा व्यवस्थापन, मुख्याध्यापक व सर्व शिक्षक-शिक्षकेतर कर्मचाऱ्यांनी कु. स्वराली मुळे हिचे मनःपूर्वक हार्दिक अभिनंदन केले असून, पुढील उज्ज्वल शैक्षणिक वाटचालीस भरभरून शुभेच्छा दिल्या आहेत.
