मोशीकरांचा पालिकेविरुद्ध थेट ‘एल्गार’; “आता एका गाड्यालाही पाय ठेवू देणार नाही!”
पिंपरी-चिंचवड | HRNews मराठी (विशेष प्रतिनिधी): मोशी कचरा डेपोवर घडलेल्या त्या भीषण दुर्घटनेनंतर पिंपरी-चिंचवडमधील कचऱ्याचा प्रश्न आता अत्यंत स्फोटक वळणावर येऊन ठेपला आहे. मोशी परिसरातील लोकप्रतिनिधी आणि नागरिकांनी पालिका प्रशासनाविरुद्ध थेट युद्धाची घोषणा केली आहे. “मोशी कचरा डेपोवर फक्त आणि फक्त भोसरी मतदारसंघाचाच कचरा टाका, पिंपरी अन् चिंचवडचा कचरा इथे आणला तर गाड्या अडवून तीव्र आंदोलन करू!” असा कडक इशारा भाजपचे धडाडीचे नगरसेवक निखिल शिवाजी बो-हाडे यांनी पालिका प्रशासनाला दिला आहे.या संदर्भात बो-हाडे यांनी थेट महापालिका आयुक्त डॉ. विजय सूर्यवंशी यांची भेट घेऊन त्यांना मागण्यांचे ‘झणझणीत’ निवेदन सुपूर्द केले.
८ जुलैच्या दुर्घटनेनंतर संतापाचा उद्रेक! ८ जुलै २०२६ रोजी मोशी कचरा डेपोत कचऱ्याचा डोंगर थेट ‘वेस्ट टू एनर्जी’ प्रकल्पावर कोसळला. या काळजाचा थरकाप उडवणाऱ्या दुर्घटनेत ९ निष्पाप कामगारांना आपला जीव गमवावा लागला. या भीषण अपघातानंतरही महापालिका प्रशासन ढिम्म असून, संपूर्ण शहराचा कचरा मोशीच्याच पदरात टाकण्याचा घाट घालत असल्यामुळे स्थानिक नागरिकांमध्ये तीव्र संतापाची लाट आहे.
४० लाख लोकसंख्या, १५०० टन कचरा : मोशीकर किती सहन करणार?अनेक दशकांचा वनवास: १९८२ पासून म्हणजे गेल्या ४४ वर्षांपासून मोशीकर संपूर्ण शहराची घाण सहन करत आहेत.कचऱ्याचा महापूर: आज शहराची लोकसंख्या ४० लाखांच्या पार गेली असून, रोज तब्बल १,५०० मेट्रिक टन कचरा तयार होतोय.आरोग्य धोक्यात: या अवाढव्य कचऱ्यामुळे मोशी परिसरातील नागरिकांचे आरोग्य, पर्यावरण आणि सुरक्षा पूर्णपणे धोक्यात आली आहे.“पिंपरी आणि चिंचवड विधानसभा मतदारसंघांनी स्वतःचा कचरा स्वतः जिरवावा! त्यांच्यासाठी स्वतंत्र व पर्यायी कचरा व्यवस्थापन प्रकल्प तात्काळ उभे करा,” अशी रोकडी मागणी आता लोकप्रतिनिधींनी लावून धरली आहे.
...तर कचरा डेपोच्या गेटवरच ठिय्या आंदोलन! नगरसेवक निखिल बो-हाडे यांनी प्रशासनाला स्पष्ट शब्दांत सुनावले आहे की, जर पिंपरी-चिंचवड महापालिकेने अन्य मतदारसंघांतील कचरा मोशीत आणण्याचा प्रयत्न केला, तर स्थानिक नागरिक, ग्रामस्थ आणि सर्व नगरसेवक रस्त्यावर उतरतील. कचरा डेपोच्या मुख्य प्रवेशद्वारावरच ठिय्या मारून पालिकेची कोंडी केली जाईल, असा सज्जड दमही त्यांनी दिला आहे.या वादामुळे शहरातील कचरा व्यवस्थापनाचा प्रश्न आता कमालीचा चिघळला असून, आगामी काळात पालिकेचा ‘कचरा’ होणार की प्रशासन काही ठोस पाऊल उचलणार, याकडे संपूर्ण शहराचे लक्ष लागले आहे.
कडक प्रतिक्रिया:” आमची भूमिका अगदी स्पष्ट आहे. मोशीकरांनी आजवर शहरासाठी खूप मोठा त्याग केलाय. आता त्यांच्या सहनशीलतेचा अंत पाहू नका. पिंपरी आणि चिंचवडचा कचरा सांभाळणे ही पालिकेची जबाबदारी आहे, मोशीची नाही! मोशीकरांच्या आरोग्याशी आणि सुरक्षिततेशी आम्ही खेळू देणार नाही. प्रशासनाने वेळीच पावले उचलली नाहीत, तर सर्वपक्षीय लोकप्रतिनिधी आणि ग्रामस्थांना सोबत घेऊन लोकशाही मार्गाने इतके तीव्र आंदोलन उभारू, की प्रशासनाला पळता भुई थोडी होईल! न्याय मिळेपर्यंत हा लढा थांबणार नाही.”- निखिल बो-हाडे (नगरसेवक, भाजप, मोशी)
