मराठवाडा जनविकास संघातर्फे पालखी सोहळ्यातील वारकऱ्यांसाठी ७ पाणी टँकर रवाना; ५०० हून अधिक वृक्षांचे वाटप
पिंपळे गुरव: संतश्रेष्ठ ज्ञानेश्वर महाराज आणि जगद्गुरू संत तुकाराम महाराज पालखी सोहळ्यातील वारकऱ्यांची तहान भागवण्यासाठी मराठवाडा जनविकास संघाच्या वतीने यंदाही सात भव्य पाणी टँकर वारकऱ्यांच्या सेवेत दाखल करण्यात आले आहेत.
या उपक्रमाचे हे दशकपूर्ती वर्ष असून, आळंदी व देहू येथून पंढरपूरकडे मार्गस्थ होणाऱ्या विविध दिंड्यांसोबत हे टँकर संपूर्ण वारी मार्गावर मोफत व शुद्ध पिण्याचे पाणी पुरवणार आहेत.
पिंपळे गुरव येथे आयोजित एका विशेष कार्यक्रमात संत-महंत आणि मान्यवरांच्या हस्ते या टँकरचे विधिवत पूजन करून ते रवाना करण्यात आले. याप्रसंगी दिंडी प्रमुखांचा पारंपरिक पद्धतीने सत्कार करण्यात आला, तसेच पर्यावरण रक्षणाचा संदेश देत ५०० हून अधिक वृक्ष रोपांचे वाटप करण्यात आले.
संत-महंत व मान्यवरांची उपस्थितीया
सोहळ्याला माजी विरोधी पक्षनेते नाना काटे, उद्योजक बाळासाहेब काटे, ह.भ.प. ज्ञानेश्वर (छोटे माऊली) कदम महाराज, श्री क्षेत्र भंडारा डोंगर देवस्थान ट्रस्टचे अध्यक्ष ह.भ.प. बाळासाहेब काशीद पाटील, विश्वस्त ह.भ.प. जगन्नाथ नाटक पाटील यांच्यासह अनेक मान्यवर उपस्थित होते.
सत्कार व सन्मान: उपस्थित दिंडी प्रमुख आणि पाहुण्यांचा टोपी, उपरणे, ‘श्री तुकाराम गाथा’ आणि ‘ज्ञानेश्वरी’ ग्रंथ देऊन गौरव करण्यात आला.आर्थिक मदत: या सामाजिक उपक्रमाला हातभार म्हणून स्थानिक हास्ययोग परिवार, नवचैतन्य हास्य क्लब आणि विविध सामाजिक संस्थांच्या महिला सदस्यांनी सढळ हाताने आर्थिक मदत सुपूर्द केली.
या दिंड्यांसोबत राहणार टँकरची सेवा
वारीच्या संपूर्ण मार्गावर वारकऱ्यांना पाण्याची कमतरता भासू नये, म्हणून खालील प्रमुख दिंड्यांसोबत हे टँकर पंढरपूरपर्यंत प्रवास करणार आहेत:
पालखी मार्गदिंडीचे नाव व क्रमांक
आळंदी ते पंढरपूर
सोपानकाका कराडकर दिंडी (क्र. ११), स्वयंभू श्रीराम प्रभू दिंडी (क्र. ३३६), कमळेश्वर दिंडी, कै. ह.भ.प. धोंडुजीबुवा चिझघरकर दिंडी (क्र. १८ – सालगांवकर), ह.भ.प. बाबूराव तांदळे महाराज दिंडी (क्र. १९७).
देहू ते पंढरपूर
श्रीक्षेत्र नवलाख उंब्रे (मावळ), श्री क्षेत्र भंडारा डोंगर प्रासादिक दिंडी (हवेली तालुका – क्र. २१ च्या मागे), श्री रोकडोबा दादा दिंडी (क्र. २० – रथापुढे).
‘जलसेवेसोबतच वृक्षदानाचा संकल्प’”वारीमध्ये लाखो वारकऱ्यांची तहान भागवणे हे मोठे पुण्यकर्म आहेच, पण त्यासोबत ५०० हून अधिक वृक्षांचे दान करून निसर्ग रक्षणाचा पवित्र संदेश देणे ही खरी ईश्वरसेवा आहे.”— ह.भ.प. छोटे माऊली कदम महाराज
मराठवाडा जनविकास संघाचे अध्यक्ष अरुण पवार यांनी संस्थेच्या वतीने कृतज्ञता व्यक्त करताना सांगितले की, “आमच्या या लोकसेवेचे हे १० वे वर्ष आहे. निसर्गाचा समतोल राखण्यासाठी आम्ही जलसेवेसोबतच वृक्षदानाचा संकल्प केला आहे. वारी मार्गावर वारकऱ्यांना शुद्ध पाणी मिळावे यासाठी आमची टीम सातत्याने कार्यरत राहील.” या कार्यक्रमाला मराठवाडा जनविकास संघाचे पदाधिकारी, विविध ज्येष्ठ नागरिक संघांचे प्रतिनिधी, हास्ययोग परिवाराचे सदस्य आणि परिसरातील वारकरी व नागरिक मोठ्या संख्येने उपस्थित होते.
