पिंपळे गुरवच्या ‘विजयराज नागरी सहकारी पतसंस्थे’चा गौरव.
स्व. आमदार शिवाजीराव भोसले ‘आदर्श पतसंस्था पुरस्कार’ प्रदान.
पिंपळे गुरव (प्रतिनिधी) दि. ३ : आर्थिक शिस्त, पारदर्शक कारभार आणि सामाजिक बांधिलकी जपत सहकार क्षेत्रात स्वतःचा वेगळा ठसा उमटवणाऱ्या पिंपळे गुरव येथील विजयराज नागरी सहकारी पतसंस्थेला पुणे जिल्हा नागरी सहकारी पतसंस्था फेडरेशनच्या वतीने २०२५-२६ या आर्थिक वर्षाचा मानाचा ‘स्व. आमदार शिवाजीराव भोसले आदर्श पतसंस्था पुरस्कार’ देऊन नुकतेच गौरविण्यात आले. बँकिंग क्षेत्रातील उल्लेखनीय व आदर्शवत कामगिरीबद्दल हा बहुमान प्रदान करण्यात आला.
पुण्यात आयोजित भव्य सोहळ्यात फेडरेशनच्या अध्यक्षा रेश्मा अनिल भोसले, उपाध्यक्ष शामराव हुलावळे आणि सेक्रेटरी संतोष भेगडे यांच्या हस्ते हा पुरस्कार सन्मानपूर्वक सुपूर्द करण्यात आला. विजयराज पतसंस्थेचे अध्यक्ष अरुण पवार, उपाध्यक्ष सूर्यकांत कुरूलकर, खजिनदार सखाराम वालकोळी, संचालक बाळासाहेब धावणे आणि व्यवस्थापक युवराज नलवडे यांनी हा पुरस्कार स्वीकारला.
आर्थिक स्थैर्यासह सामाजिक बांधिलकीची २४ वर्षे
गेल्या २४ वर्षांपासून यशस्वी वाटचाल करणाऱ्या विजयराज नागरी सहकारी पतसंस्थेने सहकार क्षेत्रात विश्वासार्हतेचे नवे समीकरण निर्माण केले आहे. संस्थेने दरवर्षी ऑडिटमध्ये सातत्याने ‘अ’ वर्ग मिळवत आर्थिक पारदर्शकता सिद्ध केली असून, सभासदांना सातत्याने १३ टक्के लाभांश देण्याची गौरवशाली परंपरा कायम ठेवली आहे. केवळ बँकिंगपुरते मर्यादित न राहता संस्थेने ज्येष्ठ नागरिक, अंध, अपंग बांधव आणि गरजू सामाजिक संस्थांना वेळोवेळी भरीव आर्थिक हातभार लावला आहे. संस्थेच्या वृक्ष लागवड व संवर्धन चळवळीची दखल घेत राज्य शासनाने अध्यक्ष अरुण पवार यांना यापूर्वीच ‘राज्यस्तरीय छत्रपती शिवाजी महाराज वनश्री पुरस्कारा’ने सन्मानित केले आहे.
“हा पुरस्कार म्हणजे विजयराज परिवाराच्या २४ वर्षांच्या प्रामाणिक आणि पारदर्शक कारभाराची पोचपावती आहे. हा सन्मान केवळ संस्थेचा नसून सर्व संचालक मंडळ, कर्मचारी आणि आमच्यावर जिवापाड विश्वास ठेवणाऱ्या हजारो सभासदांचा आहे. भविष्यातही सभासदांच्या हितासाठी, आर्थिक प्रगतीसाठी आणि समाजाच्या सेवेसाठी आम्ही कटिबद्ध राहू. संस्थेला ‘अ’ वर्ग ऑडिट आणि १३ टक्के लाभांश देण्याची परंपरा अशीच पुढे सुरू राहील.”— अरुण पवार, अध्यक्ष, विजयराज नागरी सहकारी पतसंस्था, पिंपळे गुरव.
