आसूच्या चांदणी विद्यालयाची कुस्तीपटू कु. पायल जाधवची राज्यस्तरीय कुस्ती स्पर्धेत धडक.
लातूर विभागीय स्पर्धेत पटकावला प्रथम क्रमांक.
परांडा/आसू (प्रतिनिधी) दि. ३: समता शिक्षण प्रसारक मंडळ, परांडा संचालित चांदणी विद्यालय, आसू येथील कुस्तीपटू कुमारी पायल विक्रम जाधव हिने आपल्या अष्टपैलू खेळाच्या जोरावर लातूर विभागीय कुस्ती स्पर्धेत देदीप्यमान यश मिळवले आहे. तिने १७ वर्षे वयोगटातील ४९ किलो वजन गटात प्रतिस्पर्ध्यांवर मात करत प्रथम क्रमांक पटकावला असून, तिची राज्यस्तरीय कुस्ती स्पर्धेसाठी दिमाखदार निवड झाली आहे. तिच्या या दैदिप्यमान यशामुळे आसू पंचक्रोशीसह परांडा तालुक्यात आनंदाचे वातावरण निर्माण झाले आहे.
विभागीय पातळीवरील अटीतटीच्या सामन्यांमध्ये पायलने चपळ डावपेच आणि ताकदीच्या जोरावर सर्व फेऱ्यांमध्ये बाजी मारत थेट अव्वल स्थान गाठले. तिच्या या यशाबद्दल संस्थेच्या वतीने तिचे मनःपूर्वक अभिनंदन करण्यात आले असून पुढील राज्यस्तरीय लढतीसाठी तिला विशेष शुभेच्छा देण्यात आल्या आहेत.
या यशाबद्दल संस्थेच्या सचिवा श्रीमती विमल भातलवंडे मॅडम, अध्यक्ष श्री. दादाराव होरे, उपाध्यक्ष श्री. मोहनराव पाटील, तसेच विद्यालयाच्या मुख्याध्यापिका सौ. प्रज्ञा कुलकर्णी मॅडम, सर्व शिक्षक आणि शिक्षकेतर कर्मचारी यांनी पायलचे कौतुक केले असून तिच्या भावी क्रीडा प्रवासासाठी शुभेच्छा दिल्या आहेत. ग्रामीण भागातील खेळाडू राज्यपातळीवर चमक दाखवत असल्याबद्दल पंचक्रोशीतून तिच्यावर अभिनंदनाचा वर्षाव होत आहे.
