‘बातमी’चा इम्पॅक्ट: चिंचवडमध्ये तक्रारीनंतर अवघ्या २४ तासांत गॅस सिलिंडरचे वितरण
प्रशासकीय यंत्रणा हलली; ग्राहकाला मिळाला मोठा दिलासा
पिंपरी-चिंचवड प्रतिनिधी २३ :माध्यमांनी सर्वसामान्यांचे प्रश्न लावून धरल्यास प्रशासनाला जाग येते, याचा प्रत्यय पुन्हा एकदा चिंचवड परिसरात आला आहे. गॅस सिलिंडर वितरणाबाबत ग्राहकाने केलेल्या तक्रारीची दखल पत्रकार बांधवांनी घेताच, प्रलंबित असलेले सिलिंडर अवघ्या एका दिवसात ग्राहकाच्या दारात पोहोचले आहे.
नेमके प्रकरण काय?
चिंचवड येथील ग्राहक श्री. प्रकाश बचुमल नारंग (ग्राहक क्रमांक: ६८१२५८) यांनी १० मार्च २०२६ रोजी गॅस सिलिंडर बुक केला होता (बुकिंग क्र. ६६०५९६). मात्र, बुकिंग करून बराच काळ लोटला तरी गॅस एजन्सीकडून सिलिंडरचे वितरण केले जात नव्हते. वारंवार पाठपुरावा करूनही दाद मिळत नसल्याने अखेर श्री. नारंग यांनी प्रशासनासह माध्यम प्रतिनिधींकडे आपली व्यथा मांडली.
माध्यमांच्या पाठपुराव्याला यश
हे प्रकरण पत्रकारांच्या निदर्शनास येताच त्यांनी या विषयाचे गांभीर्य ओळखून प्रशासकीय पातळीवर आणि संबंधित गॅस एजन्सीकडे पाठपुरावा सुरू केला. माध्यमांमध्ये हा विषय चर्चेत येताच गॅस वितरक आणि संबंधित यंत्रणेने तत्काळ हालचाली सुरू केल्या. परिणामी, गेले अनेक दिवस प्रलंबित असलेले सिलिंडर तक्रार प्राप्त झाल्यापासून केवळ २४ तासांच्या आत ग्राहकाला वितरित करण्यात आले.
“माध्यमांच्या ताकदीमुळे आणि पत्रकार बांधवांनी केलेल्या पाठपुराव्यामुळेच मला वेळेत गॅस मिळू शकला. जनतेच्या प्रश्नांवर त्वरित लक्ष वेधण्याची किमया माध्यमांनी करून दाखवली आहे,”
अशा भावना प्रकाश नारंग यांनी व्यक्त करत सर्व पत्रकारांचे आभार मानले.या घटनेमुळे चिंचवड परिसरात माध्यमांच्या ‘इम्पॅक्ट’ची चर्चा होत असून, ग्राहकांच्या समस्यांकडे दुर्लक्ष करणाऱ्या यंत्रणांचे धाबे दणाणले आहेत.
