पालखी सोहळ्यात महिला भाविकाचे दीड लाखाचे गंठण लांबवणारी ‘ती’ टोळी रंगेहात गजाआड
दिघी प्रतिनिधी दि. ९ : माऊलींच्या पालखी सोहळ्याच्या गर्दीचा फायदा घेऊन भाविकांना लुटणाऱ्या टोळ्या सक्रिय झाल्या असतानाच, दिघी पोलिसांनी एका सराईत महिला चोरट्या टोळीच्या मुसक्या आवळल्या आहेत. संत ज्ञानेश्वर महाराज पालखी विसावा परिसरात एका महिला भाविकाच्या गळ्यातील तब्बल १ लाख ५० हजार रुपयांचे सोन्याचे मिणी गंठण जबरदस्तीने हिसकावून पळून जाणाऱ्या दोन महिलांना पोलिसांनी रंगेहात पकडले आहे.
याप्रकरणी पोलिसांनी नयना विष्णू काळे (वय २०, रा. मिटमिटा, छावणी, संभाजीनगर) हिला बेड्या ठोकल्या असून, तिच्यासोबत असलेल्या एका विधीसंघर्षित बालकाला (नाबालिग मुलगी) ताब्यात घेतले आहे.
गर्दीत गाठले अन् गळ्यात हात टाकला!
मिळालेल्या माहितीनुसार, श्री संत ज्ञानेश्वर महाराज पालखी सोहळा दिघी गावात विसावला असताना, दर्शन घेण्यासाठी भाविकांची प्रचंड गर्दी झाली होती. याच गर्दीचा गैरफायदा आरोपी नयना काळे आणि तिच्या साथीदार मुलीने घेतला. त्यांनी दर्शन रांगेत असलेल्या एका महिला भाविकाला टार्गेट केले. धक्काधक्कीचा फायदा उठवत या दोघींनी महिला भाविकाच्या गळ्यातील १३.०६० ग्रॅम वजनाचे, सोन्याचे मिणी गंठण (किंमत १,५०,०००/- रुपये) मागून जोरात हिसकावले आणि तोडले.
महिला ओरडली, पोलिसांनी झडप घातली!
गळ्यातून दागिना हिसकावल्याचे लक्षात येताच संबंधित महिला भाविकाने प्रसंगावधान राखून तात्काळ ‘चोर-चोर’ असा जोरदार आरडाओरडा केला. पालखी बंदोबस्तासाठी घटनास्थळीच तैनात असलेल्या तत्पर पोलीस कर्मचाऱ्यांनी आवाज ऐकताच सेकंदाच्या आत हालचाल केली. पळून जाण्याच्या प्रयत्नात असलेल्या नयना काळे आणि तिच्या साथीदाराला पोलिसांनी झडप घालून जागेवरच दबोचले. त्यांच्याकडून चोरीला गेलेले दीड लाखांचे सोन्याचे गंठण पेडल्ससह जप्त करण्यात आले आहे.
पोलिसांचे आवाहन: आषाढी वारी आणि पालखी सोहळ्याच्या पार्श्वभूमीवर गर्दीच्या ठिकाणी पोलीस साध्या वेशात गस्त घालत आहेत. भाविकांनी दर्शनासाठी जाताना आपल्या मौल्यवान दागिन्यांची आणि वस्तूंची काळजी घ्यावी. कोणतीही संशयास्पद व्यक्ती आढळल्यास तात्काळ पोलिसांशी संपर्क साधावा.
