आर्थिक संकटाला कंटाळून एकाच कुटुंबाचा आत्महत्येचा प्रयत्न; पतीचा करुण अंत, पत्नी व मुलगी आयसीयूमध्ये!
पिंपरी-चिंचवड (प्रतिनिधी) दि. १ : शहरातील अत्यंत शांत व उच्चभ्रू समजल्या जाणाऱ्या मोरवाडी परिसरातून एक अत्यंत मन सुन्न करणारी बातमी समोर आली आहे. तीव्र आर्थिक विवंचनेला कंटाळून एकाच कुटुंबातील तिघांनी सामूहिक आत्महत्येचा थरारक प्रयत्न केला. या दुर्दैवी घटनेत कुटुंबप्रमुखाचा जागीच तडफडून मृत्यू झाला असून, त्यांची पत्नी आणि तरूण मुलगी मृत्यूशी झुंज देत आहेत. या घटनेमुळे परिसरात तीव्र हळहळ व्यक्त केली जात असून सर्वत्र खळबळ उडाली आहे.
नेमकी घटना काय? मिळालेल्या सुन्न करणाऱ्या माहितीनुसार, मोरवाडी येथील ‘करिष्मा ग्लोरी सोसायटी’ (ए/५, फ्लॅट क्र. २०१) मध्ये भाड्याने राहणाऱ्या पिल्लाई कुटुंबावर काळाने हा घाला घातला आहे. मूळचे केरळ येथील असणारे विनोद पिल्लाई (वय ५०), त्यांची पत्नी शैलेजा पिल्लाई (वय ४५) आणि मुलगी पूर्णिमा पिल्लाई (वय १९) हे गेल्या काही काळापासून अत्यंत भीषण आर्थिक अडचणींचा सामना करत होते.
आर्थिक कोंडीतून बाहेर पडण्याचा कोणताही मार्ग न दिसल्याने या कुटुंबाने टोकाचा निर्णय घेतला. त्यांनी घराचे दरवाजे-खिडक्या बंद करून आत कोळसा पेटवून त्याचा तीव्र धूर केला आणि सोबतच विषारी औषध प्राशन करून जीवनयात्रा संपवण्याचा प्रयत्न केला.
घरात सापडली थरकाप उडवणारी ‘सुसाइड नोट’ घटनेची माहिती मिळताच पोलिसांनी घटनास्थळी धाव घेऊन दरवाजा उघडून पाहिला असता आत अत्यंत विषण्ण करणारे दृश्य होते. तिघांनाही तात्काळ पिंपरीतील वायसीएम (YCM) रुग्णालयात हलवण्यात आले. मात्र, डॉक्टरांनी तपासणीअंती कुटुंबप्रमुख विनोद पिल्लाई यांना मृत घोषित केले. तर पत्नी शैलेजा व मुलगी पूर्णिमा यांच्यावर अतिदक्षता विभागात गंभीर स्थितीत उपचार सुरू आहेत.
घटनास्थळाची झडती घेतली असता पोलिसांच्या हाती एक ‘सुसाइड नोट’ लागली आहे. “आम्ही तीव्र आर्थिक संकटात असून या अडचणींना कंटाळूनच हे पाऊल उचलत आहोत,” असा हृदयद्रावक उल्लेख या चिठ्ठीत करण्यात आल्याचे समजते.
पोलीस तपासाचे चक्र वेगाने या घटनेची माहिती केरळ येथील त्यांच्या नातेवाईकांना देण्यात आली असून, संत तुकाराम नगर पोलीस ठाण्याचे पथक या प्रकरणी अधिक तपास करत आहे. या कुटुंबावर नेमके किती कर्ज होते किंवा त्यांना कुणाचा मानसिक ताण होता का? या सर्व बाजूंचा पोलीस आता कसून तपास करत आहेत.
एका सुखी-समाधानी दिसणाऱ्या कुटुंबाचा आर्थिक विवंचनेतून असा करुण अंत झाल्याने पिंपरी-चिंचवड शहरात सुन्न करणारे वातावरण पसरले आहे.
