पुणे पदवीधर व शिक्षक मतदारसंघात भाजपला ‘राष्ट्रीय श्रमिक आघाडी’चा जाहीर पाठिंबा.
डॉ. स्मिता जाधव आणि कौस्तुभ गावडे यांच्या विजयासाठी कामगार नेते यशवंतभाऊ भोसले यांचे मतदारांना थेट आवाहन!
पिंपरी (विशेष प्रतिनिधी) दि. १८ : पुणे पदवीधर आणि शिक्षक मतदारसंघाच्या निवडणुकीत राजकीय वातावरण चांगलेच तापले असून, कामगार वर्गाचे भक्कम पाठबळ असलेल्या ‘राष्ट्रीय श्रमिक आघाडी’ने भारतीय जनता पक्षाच्या उमेदवारांना जाहीर पाठिंबा घोषित केला आहे. पुणे पदवीधर मतदारसंघातून भाजपच्या उमेदवार डॉ. स्मिता योगेश जाधव आणि शिक्षक मतदारसंघातील उमेदवार कौस्तुभ मुरलीधर गावडे यांना पदवीधर व शिक्षक मतदारांनी प्रचंड मतांनी विजयी करावे, असे रोखठोक आवाहन राष्ट्रीय श्रमिक आघाडीचे अध्यक्ष तथा ज्येष्ठ कामगार नेते यशवंतभाऊ भोसले यांनी केले.
संत तुकाराम नगर, पिंपरी येथे आयोजित धडाकेबाज पत्रकार परिषदेत भोसले बोलत होते. यावेळी नंदू आप्पा कदम, महेंद्र बाविस्कर, मंगेश धाडगे, दिनेश पाटील आदी प्रमुख पदाधिकारी उपस्थित होते.”आपल्या मातीतील सुशिक्षित नेतृत्वाला संधी द्या!” — यशवंतभाऊ भोसले.
पत्रकार परिषदेत दोन्ही उमेदवारांच्या शैक्षणिक व सामाजिक कार्याचा पाढा वाचताना यशवंतभाऊ भोसले म्हणाले:
१). डॉ. स्मिता योगेश जाधव (पुणे पदवीधर): “डॉ. स्मिता जाधव या शिक्षणमहर्षी पी. डी. पाटील यांच्या कन्या असून त्या याच मातीत लहानाच्या मोठ्या झाल्या आहेत. गेल्या १७ वर्षांहून अधिक काळ त्यांचा शिक्षण क्षेत्राशी थेट संबंध आहे. पिंपरी-चिंचवडसह संपूर्ण देशाला दिशा देणाऱ्या डी. वाय. पाटील संस्थेचे विद्यार्थी आज जगभरात नाव कमावत आहेत. आपल्याच शहरातील सुशिक्षित आणि कर्तृत्ववान कन्येला विधिमंडळात आपले प्रतिनिधित्व करण्याची संधी पदवीधरांनी दिलीच पाहिजे. पुणे पदवीधरमधील पाचही जिल्ह्यांतील मतदारांनी एकजुटीने भाजपच्या पाठीशी उभे राहावे.”
२).कौस्तुभ मुरलीधर गावडे (पुणे शिक्षक मतदारसंघ): “कौस्तुभ गावडे हे उच्चशिक्षित (एम.कॉम, एमबीए) असून, शिक्षणमहर्षी डॉ. बापूजी साळुंखे यांचा समृद्ध वारसा त्यांना लाभला आहे. शिक्षण क्षेत्राची खरी जाण असलेल्या उमेदवारांना संधी देऊन भाजपने योग्य पाऊल उचलले आहे. शिक्षकांच्या न्याय्य हक्कांसाठी गावडे हेच योग्य पर्याय ठरतील.”
राज्यात सर्वत्र भाजप उमेदवारांच्या पाठीशी श्रमिक आघाडी!
केवळ पुणे विभागच नव्हे, तर राज्यभरात भारतीय जनता पक्षाने शिक्षक व पदवीधर मतदारसंघांत रिंगणात उतरवलेल्या सर्व उमेदवारांना ‘राष्ट्रीय श्रमिक आघाडी’ने जाहीर पाठिंबा दिला असल्याची घोषणा भोसले यांनी केली. शिक्षक आणि पदवीधरांनी मतदानाचा हक्क १०० टक्के बजावत भाजपच्या दोन्ही उमेदवारांना विधान परिषदेत पाठवून एक नवा इतिहास घडवावा, असा निर्धारही यावेळी व्यक्त करण्यात आला.
