पिंपरी-चिंचवड (प्रतिनिधी): दि. १२ महिलांच्या गळ्यातील सोन्याचे दागिने जबरदस्तीने खेचणाऱ्या एका सराईत आणि खतरनाक चैन स्नॅचरला पिंपरी-चिंचवड गुन्हे शाखा युनिट-१ च्या पथकाने फिल्मी स्टाईलने पाठलाग करून बेड्या ठोकल्या आहेत. अटक करण्यात आलेल्या आरोपीकडून तब्बल १५,००,००० रुपये किमतीचे सोन्याचे दागिने (७६ ग्रॅम) आणि गुन्ह्यात वापरलेल्या २ स्पोर्ट बाईक्स जप्त करण्यात आल्या आहेत. या धडक कारवाईमुळे सांगवी, दापोडी, तळेगाव, देहूरोड आणि भारती विद्यापीठ पोलीस ठाण्यांमधील एकूण ०५ गंभीर गुन्हे उघडकीस आले आहेत.
बाणेर भागात अहोरात्र सापळा आणि थरारक पकडापकडी
दिनांक ३ जून २०२६ रोजी सांगवी पोलीस ठाण्याच्या हद्दीतील पिंपळे निलख येथे एका पायी चालणाऱ्या नागरिकाच्या गळ्यातील २ तोळ्यांची सोन्याची चैन स्पोर्ट बाईकवरून आलेल्या अज्ञात चोरट्याने खेचून नेली होती. घटनेचे गांभीर्य ओळखून पोलीस आयुक्त श्री. विनयकुमार चौबे यांनी तात्काळ गुन्हे शाखेला तपासाचे आदेश दिले.
गुन्हे शाखा युनिट-१ चे वरिष्ठ पोलीस निरीक्षक अरविंद पवार यांच्या मार्गदर्शनाखाली दोन विशेष पथके तयार करण्यात आली. पथकाने आरोपीच्या येण्या-जाण्याच्या मार्गावरील तब्बल १५० ते २०० सीसीसीटीव्ही (CCTV) फुटेजची कसून तपासणी केली. यादरम्यान आरोपी बंगलोर हायवेचा वापर करून नेहमी बाणेर भागात फिरत असल्याचे निदर्शनास आले.
पथकाने बाणेर परिसरात दोन ते तीन दिवस अहोरात्र सापळा रचला.
७ जून रोजी रात्री संशयित आरोपी तिथे आला असता, पोलिसांचा सुगावा लागताच त्याने स्पोर्ट बाईकवरून पळ काढण्याचा प्रयत्न केला. मात्र, पोलिसांनी जिवाची पर्वा न करता फिल्मी स्टाईलने थरारक पाठलाग करून त्याला झडप घालून ताब्यात घेतले.
आरोपीची माहिती आणि गुन्हेगारी इतिहासनाव: सुमित गोविंद इंगळे (वय ३१ वर्षे)सध्याचा पत्ता: मामुर्डी गाव, ता. हवेली, जि. पुणेमूळ पत्ता: मु.पो. श्रीपत पिंपरी, ता. बार्शी, जि. सोलापूरतपासात निष्पन्न झाले की, हा आरोपी अत्यंत सराईत असून तो एकटाच स्पोर्ट बाईकवर येऊन चैन स्नॅचिंग करायचा. यापूर्वीही त्याच्यावर हिंजवडी, सांगवी, शिरवळ आणि सिंहगड रोड पोलीस ठाण्यांमध्ये तब्बल ८ गंभीर गुन्हे दाखल आहेत.
या पोलीस पथकाची उल्लेखनीय कामगिरी
सदरची धडाकेबाज कामगिरी पोलीस आयुक्त श्री विनय कुमार चौबे, सह पोलीस आयुक्त श्री शशिकांत महावरकर, अप्पर पोलीस आयुक्त श्री सारंग आवाड, पोलीस उप आयुक्त (गुन्हे) रोहिदास पवार, आणि सहायक पोलीस आयुक्त डॉ. विशाल हिरे यांच्या मार्गदर्शनाखाली करण्यात आली.
कारवाईत सामील पथक:
गुन्हे शाखा युनिट-१ चे प्रभारी वरिष्ठ पोलीस निरीक्षक अरविंद पवार, सपोनि दत्तात्रय गुळीग, पोउनि कर्मराज गावडे, शिवानंद स्वामी, सपोउपनि प्रमोद वेताळ, संतोष इंगळे, मपोहवा उषा दळे, पोहवा महादेव जावळे, देवा राऊत, शिवराम भोपे, अजय डगळे, सागर अवसरे, मारुती करचुंडे, विजय शेळकंदे, पोशि संदेश देशमुख, विजय जानराव, तेजस भालचिम, सोहेल चिखलकर आणि केशव चेपटे.
