उन्नती सोशल फाउंडेशनच्या ‘स्वर निनाद’ मैफिलीने रसिक मंत्रमुग्ध.
शास्त्रीय ते सुगम संगीताचा बहारदार स्वराविष्कार!
बालकलावंतांसह ज्येष्ठ शिष्यांच्या सादरीकरणाने जिंकली मने; नगरसेविका डॉ. कुंदाताई भिसे यांच्या गायनाने मैफिलीत भरली आगळी रंगत
पिंपळे सौदागर प्रतिनिधी दि. २१ : उन्नती सोशल फाउंडेशनच्या वतीने आयोजित करण्यात आलेल्या ‘स्वर निनाद’ या सुरेल मैफिलीला स्थानिक संगीतप्रेमी आणि रसिकांनी उत्स्फूर्त प्रतिसाद दिला. रविवार, दि. २० रोजी सायंकाळी उन्नतीच्या प्रांगणात पार पडलेल्या या सांगीतिक सोहळ्यात प्रसिद्ध गीतकार, संगीतकार व गायिका भारती न्यायाधीश आणि त्यांच्या शिष्य कलावंतांनी सादर केलेल्या शास्त्रीय, सुगम व लोकप्रिय चित्रपट गीतांच्या बहारदार सादरीकरणाने उपस्थित रसिकांना मंत्रमुग्ध केले.
विशेष म्हणजे, पिंपरी-चिंचवड महानगरपालिकेच्या विधी समिती सदस्या तथा स्थानिक नगरसेविका डॉ. कुंदाताई भिसे यांनी संत तुकाराम महाराजांची “ओंकार प्रधान रूप गणेशाचे” ही अजरामर रचना अत्यंत भावपूर्ण सुरात सादर केली. त्यांच्या या सादरीकरणाने एका राजकीय नेतृत्वात दडलेल्या संवेदनशील कलाकाराचे रसिकांना दर्शन घडवून दिले.
कार्यक्रमातील ठळक वैशिष्ट्ये
गणेशस्तवनाने सुरेल प्रारंभ : मैफिलीची सुरुवात “आले रे गणपती आज दारी रे” या मंगलमय गणेशस्तवनाने झाली.अभिजात रागदारीची मेजवानी : कलावंतांनी हिंदुस्थानी शास्त्रीय संगीतातील राग यमन, भूप, बिहाग, काफी आणि भीमपलास यांसारख्या विविध रागांतील बंदिशी सादर करून वातावरणात शास्त्रीय संगीताचे रंग भरले.बालकलावंत आणि ज्येष्ठांचा सहभाग : इरा, शौर्यवी, राघवी, ध्वनी, अथर्व, आस्मी, ओजस्वी, पयोधी, सौम्या, गार्गी, श्रीयान या बालकलावंतांसह सुलभा माने, प्रभा बसवंते, रेखा देवपूरकर, सुचिता सिदनाळे आणि सुनीता सावळे या ज्येष्ठ महिला कलावंतांनी वैविध्यपूर्ण गाणी सादर करून दाद मिळवली.साथसंगत व निवेदन : सर्व कलाकारांना तबल्यावर चैतन्य डांगे यांनी अप्रतिम साथ दिली, तर संवादिनीवर स्वतः भारती न्यायाधीश यांनी स्वरसाज चढवला. संपूर्ण कार्यक्रमाचे खुमासदार निवेदन भामिनी महाले यांनी केले.‘वंदे मातरम्’ने सांगता : उत्तरोत्तर रंगत गेलेल्या या सुरेल मैफिलीचा भावस्पर्शी समारोप भारती न्यायाधीश यांच्या आवाजातील “वंदे मातरम्”च्या जयघोषाने झाला.
कार्यक्रमानंतर उन्नती सोशल फाउंडेशनचे संस्थापक संजय भिसे, नगरसेविका डॉ. कुंदाताई भिसे, पिंपरी-चिंचवड कल्चरल फाउंडेशनचे अध्यक्ष विजय भिसे आणि उद्योजक धनंजय भिसे यांच्या हस्ते सहभागी सर्व कलावंतांचा यथोचित सन्मान करण्यात आला. या सांगीतिक पर्वणीचा आनंद घेण्यासाठी परिसरातील रसिक श्रोते मोठ्या संख्येने उपस्थित होते.
